Kuminah hian, February 27 –March 1 chhungin KṬP Gen. Conference vawi 58-na chu Serchhipah nghah a ni dawn a. Kum 1981 leh 1998-ah khan an thleng tawh bawk a. Kum 1998 kha CKṬP-ah Asst. Secy chanvo ka chelh ve lai a ni a, KṬP aṭanga kum over avanga min thlahliam kum a ni bawk. Thingsulthliah Bial Zaipawlin CKṬP hruaitu kalchhuak turte pual liau liauva an hla chuam kha an rem nghe nghe a. A hla thu kha – Hai ang tarin, chhawl thliah iangin uai mah se, kan thlah liam e hranghlui chang tur…. tih vel a ni ta awm e.

Kum 1998 aṭang chuan kum 22 lai a lo vei ta a. Suangtuahna mitthlain ka han thlir kir a, chiang takin a la lang uar uar mai. Pandal Field bul mai BDO Banglaah RK Lianzuala te nen kan thleng ho a. Ani hi CKṬP hruaitu hlui a nih bakak AIR correspondent angin a kal). BDO Thawmtea (Lalthawmmawia, MCS) te nupa khan min va duat tak. Hemi ṭum Gen. Conference-a KṬP over, hai ang tara hranghlui chang mai tura min thlahliam kha, Pathian khawngaihnain dam leh hrisel taka tun hun kan han thleng thei hi a lawmawm rual rualin a va lunglenthlak si em! Khatih hun laia CKṬP Leader Rev. Thangdela chuan March 7, 2011 khan chatuan ram min lo pansan ta a, a hun laia member duhawm tak tak, kum 2020 KṬP General Conference hmu phak ta lo hi eng zat tak awm ang maw?

Kum 1998 khan Serchhip hi in 2,800 awmna khua angah an inchhal a. General Conference palai kal zat kha Reception lamin an chhinchhiah danin 13,396 an ni a, langa kalte nen phei chuan 15,000 zet an nih rin a ni (Kum 1981-a Inkhawmpui an thlen ṭum kha chuan palai kal zat 2,000 bawr vel an ni awm e). Kum 1997 Ratu-ah khan palai riak lut 7,474 an ni a, langa kal kha 2,000 chuang zet an ni bawk a. Serchhip hi chhim leh hmar, chhak leh thlang aṭanga a panna a awlsam deuh avangin kan pung ta hluai a nih a rinawm. Kuminah hian palai eng zat tak kal ang maw?

Kum 1998 General Conference Organising Committee Chairman kha ka ṭhianpa, Shillong-a ka lehkha zirpui ṭhin Vanlalchhunga (Upa) Vanlal Chhunga a ni a, kuminah hian amah bawk Chairman-ah an ruat leh a. 1998-a an budget ruahman kha Rs. 8,00,000/- a ni a, kawng hrang hranga sum an tuak bakah KṬP member tinin Rs. 10/- ṭheuh an thawh bawk a. Kuminah hian eng zat tak ruahman ang maw? Rorelnaah CKṬP chuan kum 1998 -1999 budget atan Rs. 4,75,000/- an pharh a, pawm a ni a. Kuminah hian kum 2020 -2021 budget atana ruahman chu Rs. 60,06,000/- a ni ta daih mai (Kum kal lai budget aiin Rs. 9,20,000/-in a tlem zawk a, General Conference neih loh kum hian budget ruahman a tlem deuh ṭhin). Rawngbawlna huang a zau ta a, kum 20 kalta budget nen chuan a intam hleih ta khawp mai.

Pandal kha a dung ft.250, a vang lam ft.150-a a zau a ni a, mi 10,000 vel leng tura hisap a ni a. A ṭan zan aṭangin palaite kan leng lo va, inkhawm apiangin mi 12,000 vel inkhawm ṭhin ang kan ni a. Conference tawp zan (Pathianni zan)ah phei chuan mi 18,625 zet kan inkhawm a nih kha. Inkhawm programme zawng zawng kha khaw chhung mipuite en theih turin TV-ah live-a pek chhuah ni lo phei se chuan kan tam leh zual ngawt ang.

Speaker Rev. Vanlalzuatan Conference thupui, “Mi dangte tana nun”, tih a sawite kha ngaihthlak nawn leh chakawm tak a ni. Serchhip Conference (1998) kha hun puma KṬP General Secretary ni hmasa ber, Synod Moderator ni mek bawk Rev. Lal Rinmawia’n a rawn tawiawm thei te kha a hlutna tizualtu a ni a. Synod Executive Secretary i/c KṬP Rev. H. Remthanga nen sermon ropui tak, ngaihthlak nuam leh thlarau lam nun chawm tak tak an sawi nghe nghe a.

Character Study min zirpuitu Rev. C. Rosiama thusawite kha dam chhunga nun innghahna tlak, ṭhatpui tham vek a ni. Synod Secretary (Sr.) Upa R. Rualkhuma, Central Kohhran Hmeichhe aiawh Pi Laltlanmawii leh Pi Raltawnliani te, kan Synod Pastor leh Pro. Pastor eng emaw zat leh hmun hrang hranga kan Missionary ten min uap hneh hle a. Sorkar lama kan Chief Minister (Serchhip bialtu MLA ni bawk) Pu Lal Thanhawla te nupa khan a neitu, nu leh pa chan an chang ṭha em em bawk.

Banner kha Mission Veng KṬP Bannerians te siam a ni a, KṬP Gen. Conf. vawi 44-na a nih angin feet 44-a seia siam a ni a. Khatla KṬP ten Sound System lam an buaipui a, an hneh hle. Zai hruaitu Lalnundanga te, K. Laltuma, etc. ten min hruai hneh hle bawk a, zai a tui tluk tluk hle a ni. T. Romama hla, “Mi Thianghlimte Lenna” tih kha kan tuipui ber, Top Chart No. 1 a ni a. Haw lama Bus-a chuangte hla sak tui ber erawh F. Vanlalchhuanga phuah, “Kan kovah Lalpa’n a nghat”, tih kha a ni ta awm e.

Kum 1998 General Conference-ah khan CKṬP hruaitu 12 zinga 7 kan chhuak a, chungte chu:- K. Rosiamliana (Asst. Leader), Khatla; Zonunmawia (Asst. Secretary), Mission Veng; H. Vanlalfaka (Treasurer), Tuikual; Vanlalsawma (Fin. Secretary), Tlangnuam; Lalrikhuma Sailo, Bungkawn; Lalzuithanga, Republic Veng leh P.L. Hmachhuana, Chaltlang te kan ni.

Pathian remruat dan hi a mak ka ti ṭhin a! KṬP hruaitu leh member ka nihna anga General Conference ka hmanna hnuhnung ber chu Serchhip (1998) kha a ni a. Chuta kan Speaker chu Rev. Vanlalzuata a ni a. KṬP kum over fe hnuah Synod-in KṬP General Secretary atan min ruat avangin kan han KṬP leh lawp lawp a. GS term tawp leh ka service tawp kum 2018-ah West Phaileng-ah General Conference hlimawm tak kan hmang leh thei a, chuta kan Speaker chu Rev. Vanlalzuata bawk a ni leh a!

Kum 1998 General Conference neih hnu lawkah Speaker Rev. Vanlalzuata chuan “Ka Conference Rilru” tiin article a ziak a:- Intaina leh initsikan awm hauh lova inthurual tlang taka kan ṭhalai sing hnih deuhthaw an han thu hmur mai a – Sual vang hliam tuara chauh chang ni awm mah se, I hnung zui zel hi ka duhsam ber a ni, Ka phatsan phal tawh ngai lo vang”, tih hla saa mittui hru leh ban phar a inkawkalh nuk mai lai kha, khawvela thil thlengah chuan ennawm ka tih pawl a tling ang. E khai! Kan ram ṭhalaite nun hi a chhe zo vek deuhthaw anga sawitute hian kan lo va sawi sual nasa em! “Lalpa min ngaidam ang che”… A lo ni maw, ṭhalaite nun hi zu leh drugs avanga hliam in tuar lai kan hmuh hian, in nu leh pate kan lo mangang hma lutuk deuh va. In huatthu chauh sawi lovin, Lalpa huatthu kan lo sawi tawh hial a lo nih hi. Keini chuan, ‘Tunah chuan a uih tawh ang, a thihna a rei tawh’, tiin Pathian rin lohna sualah kan lo tlukpui tawh che u a. Nimahsela, Lal Isuan, ‘Lalzar, tho rawh’, a tih tawngkam khatah pawh sual vanga hliam in tuar hi a lo dam thei na meuh a lo nih hi. In nu leh pate hian beidawng hauh lova Lalpa kuta tlukluhpui zel che u hi kan lo va ba nasa em!, tiin….

Kumin Conference-ah hian kal ve turin CKṬP hruaitute chuan tih takzetin min sawm ve leh a (‘a derin’ ka ti phal lo). KṬP kum/term over min thlahliamna hmun kha a ni a, lung chu a la lên khawp mai. Mahse…… hi a tam ta a ni. Han kal ve ta ila, “KṬP la kham lo OVER, Inpholan tum, Eng nge a rawn tih ve leh dawn”? min lo ti tâwk an awm ang em? Lo awm pawh ni se, a âwm tho mai. Eng pawh ni sela, kan vanglai hun zawng zawng kan lo hman ral vena KṬP hi chu thinlungah a thi thei tak tak dawn lo a ang ta khawp mai.

1998-ah khan ‘SEE YOU AT KAWNPUI’, tiin kan inthlah liam a, 2020-ah chuan ‘SEE YOU AT KOLASIB’, tiin kan inthlah liam dawn a nih hi.

58th KṬP General Conference hmang tur zawng zawngte CHIBAI vek ule.

THUNAWI BELH:

Rilrua rawn lang thar a awm leh thin a, ka Edit zeuh zeuh mai teh ang.

General Conference (1998) kha February 19 -22 chhunga neih tura rel a ni a. Parliament Inthlan dawn avangin kar khata sawn hlat a ni a, February 26 –March 1 chhungin neih a ni ta a. Kuminah hian February 27 –March 1 chhungin neih a ni dawn a. Ni khata ṭan tlai angin a lang na a, ni 4 tho a awh ang. 1998 kha Leap Year kum a ni lo va, 2020 hi chu Leap Year kum a nih avangin February thlaah ni 29 a awm.

Serchhip-a Inkhawmpui neih dawn hian ruah leh thli a thawk a, pandal cheimawi sa pawh a tichhe nual a, a diak hle bawk. Mahse, an han lam tak tak a, a ro duak duak mai. Pandal panna kawng thim khan sawi a hlawh deuh a, kuminah chuan a êng ṭha tawh turah ngai ila.

KṬP Conference (1998) kha chiang taka Mafaa Hauhnar ka hriat ṭanna a ni. Kulikawn Bial awiawhin Tlangnuam Branch-in ‘The Pearly Gates’ tih drama hmuhnawm tak an chang a, Mafaa kha Setana lemah a chang a. a chang thiamin a chanvo a hneh khawp mai. Pathianni zanah kan monu U, Tlangnuam-a mi a thi a. Inkhawm banah Mafaa vek hian a thih thu min rawn hrilh a. Anni kha a zan a zanin an haw thla ta a. Keini erawh a tuk lamah thil enfel turte a awm avangin a vuina ka nang hman ta lo.

Pathianni zan inkhawm ṭan hmain kan zai tui hle a. Inkhawm ṭan hun dik takah a ṭan theih ta meuh lo va. Thu ka puan laiin mihlim, zai & lam kham lo ṭhenkhatin bengchheng an siam a, thupuan pawh a hriat hleih theih ta lo va. Kei lahin insumtheihna ka lo tlachham a, ka han khak deuh hlak a. Chutah stage hnung lamah an insawn a, ‘thlarau a zalên lo’, tiin ring tawkin min ṭawngṭai khum ta a. Stage hnung bang kha dâp tah mai a nih avangin an thawm a na hle. Mahse, hla te kan han thlang a, hlim takin an zaiin an lam zui ve leh thei ta mai a.

Inkhawmpui tawp zana “Breaking Sad News” deuh chu Pi Rii pangpar bo kha a ni a. Stage pangpar khawi mawi tak kha CM ṭhiannu Pi Rii tumsak a ni a. Palai kuthlei ṭhenkhatin inkhawm banah an thliak ta sup sup mai a. Decoration lam buaipuituten min rawn hrilh a, mike aṭangin kan han inkhap dawn a, kan inkhap zo ta meuh lo. Amah Pi Rii tak kha chuan pawi a ti em em pawh a ni lo va. Mahse, Decoration lam buaipuitute rilru a na deuh niin a lang. A senghawitu tur diktak ten an senghawi hmaa lo phawi bawrh bawrh kha thil mawi a ni lo reng a, a zahthlak bawk a. A hnu lamah chuan kan ching zui ta miah lovin ka hria….

Conference-ah hian ka nupui rai puar, nau hrin hun ṭep ka kalsan a. Inkhawmpui zawh April thlaah Pathianin fanu duhawm tak min pe a. Tunah chuan MA lai a zir ve ta.

Kan Pathian hi chu a ṭha a ni.

– Upa Zonunmawia, Mission Veng